A Xunta financia estas actuacións mediante un orzamento que supera os 500.000 euros
O proxecto prevé máis de 5,5 quilómetros de nova senda e a reparación das xa existentes noutros 650 metros.
A nova infraestructura pretende fomentar unha mobilidade sostible nas mellores condicións de seguridade
Santiago. Abril de 2016. A Consellería de Infraestruturas e Vivenda vén de formalizar o contrato que permitirá iniciar nas vindeiras semanas as obras de construción dunha senda peonil entre Fonte Díaz e o Empalme de Vilar, na estrada AC-240, no Concello de Touro. Estes traballos teñen un orzamento de 500. 914,17 euros e contan co cofinanciamento da Unión Europea a través do Fondo Europeo de Desenvolvemento Rexional (Feder) nun 80 %, no marco do programa operativo Feder Galicia 2014-2020.
O proxecto consiste na execución de sendas de formigón polas dúas marxes da estrada entre Fonte Díaz (p.q. 12+900) e o empalme de Vilar (p.q. 25+800), en treitos descontinuos que complementarán ás beirarrúas e senda xa existentes nalgúns tramos. O seu obxectivo é dotar a este treito da estrada dunha zona diferenciada para o tránsito de peóns. Coa solución prevista a estrada contará cun itinerario peonil continuo pola súa marxe dereita en todo o tramo de actuación e tamén con sendas nos tramos mais consolidados da marxe esquerda. Para isto, construiranse máis de 5,5 quilómetros de nova senda, discorrendo case 1,7 km pola marxe esquerda e preto de 3,6 km pola marxe dereita, e repararanse máis de 650 metros de tramos xa existentes. As obras levaranse a cabo na zona de dominio público do vial, polo que non se precisarán expropiacións.
A Xunta aposta por este tipo de actuacións, coas que se facilita a circulación en condicións de maior seguridade para o conxunto dos usuarios e ademáis se fomenta unha mobilidade peonil máis respectuosa co medio ambiente, alternativa ao uso do vehículo privado.
